ياطريق الشعب يا ام الجرايد
ياقصيدة واحله من كل القصايد
يامواليل الفرح بعيون غيد
يابساتين الورد والليلة عيد
احنه لو منعايدج المن نعايد
***
ياطريق الشعب يازفة حمام
يا موال وشوك واحباب وسلام
يامشاعل عالية بوجه الظلام
ياحصاد الخير بيج الخير زايد
***
يامكاتيب العشك واحنه البريد
يا نشيد احروفج وعالي النشيد
جم شهيد الطاح منج جم شهيد
وانتي مثل البحر زودج دوم زايد
***
ياطريق الشعب يا اول جرح
ياصباح الخير بشفاف الصبح
ياهوى العمال واحلام الفلح
يانجوم ابركبة الدنيه كلايد