فناجين المراجل شفّت الهيل

حمد دك اكهوه ومناطر الريل

حمد دك اكهوه ومناطر الزين

يوصل للمحطه اوتشهك العين

ولك ياريل ماشايل فراكين

شلت من جان نوره ايبدد الليل

فناجين المراجل شفّت الهيل

شلت من جان نوره ايضوي عالناس

على الفقره توطن بيه الاحساس

على حبهم ربه اوما كاطع الياس

شد جرحه اوتحمّل ويل ياويل

فناجين المراجل شفّت الهيل

عبر ليل البنفسج واشتهه الجوع

تحزم عالحداثه اوصار ينبوع

قوافيه تصب حسرات ودموع

عفيف اوبالرجوله امحزم الحيل

فناجين المراجل شفّت الهيل

حمد ذل الطغاة اوما عرف خوف

فكره اشراع عالي اوبان للشوف

طريق الشعب بالاخطار محفوف

مد روحه جسر وتقهقر السيل

فناجين المراجل شفّت الهيل

مد روحه جسر عبّر الغيره

ركب دانك هواه ابدون حيره

يدري الروح بالدنيه كصيره

شجخ روحه علم يم نجمة اسهيل

فناجين المراجل شفّت الهيل

نكل جدمه اومشه للدنيه خطار

ينحت للعقل زينات الافكار

سليم النيه مايرضخ للاخطار

السعاده من جبينه اتقبله تقبيل

فناجين المراجل شفّت الهيل

جيت ابشوك للدنيه مظفّر

البست ثوب السعاده ابلون الاحمر

نبيل احساس عالطيبات تفتر

قصايد للهوى اترتلها ترتيل

فناجين المراجل شفّت الهيل

حفرت ابذاكرة شعب العراقي

اوفكرك بالوجود اهواي راقي

عفيف ابشرف عالطيبات باقي

يساري اوماتمر بيك التجاهيل

فناجين المراجل شفّت الهيل