أجيت أشلون
وأنته تدري
دنيانه حسن متعافيه
صح فقير
لكن غني أبفكرك حسن
يا بو أعيون ترفه
أعله المحبه غافيه
أجيت أمنين؟
من يا رحم متخوم
بالحب والصدگ والعافيه
يالحروف أسمك
ترست الدنبه سوالف دافيه
الحاء حنيه
السين سلوه
النون نور
أو ذني لأوصافك
ما أظنن كافيه
يمكن أمك دگت
الثوره مضغه
أو شربتك
حب الوطن مميه
وأتلولي چانت عالمهد حنيه
أمغمسه أبشوگ
الحزب ثوريه
يا جمار گلب الناس
يا عشگ روحي
أو موده صافيه
يابو أعيون ترفه
أعله المحبه غافيه
أحبال الصلب
بعيونك مراجيح
أو چلمة الجلاد
هلهوله أو تسابيح
شوغة أمك والبچي
أبشعرك تراويح
يالشلت الحزب
وي دمك نبض
أو چان بعيونك ضوه
وأنته للثوره غوه
جيت يالجيتك كرامه
يا شرف بيك الشرف
يتباهه نيه صافيه
حاضن الثوره
محنه أو عافيه
حسن
وأنته الحسن
كل الحسن
يا بو سوالف دافيه