/
/
/
/

مهداة لحزبنا الشيوعي لمناسبة فرحة تأسيسه... 

ستة وثمانين نخلة

ستة وثمانين عيد

الزمن شيّب اگبالك

وأنت زاهي ..

بثوبگ الأحمر يرفرف 

وحيل يتجدد جديد 

إيدك اليمنه فرات

اليسره دجله.. 

جفوفگ بشط العرب

تغرف الماي الزلال

يروّي للعطشان چودگ

گطره گطره

يفيض طيبگ

من حقول الحنه تبدي 

( الفاو)... 

       للبرحي وبساتين العَنب

زقزقة عصفور بيتگ 

وبلبُلگ يصدح طرب 

(بنگرة السلمان) ذكرى 

ونفق للثاير بنيت 

قلعة (الحلة) وسجنها 

فتّحت بالظلمه نور 

وبقطار الموت يمشي

يمشي يمشي.. 

السچه تزرعها ورود 

خضّرت بستان روحگ

 ياسمين وحنطة سمرة 

من (السماوة) ل(رقم واحد) للسجن 

گل خناچرهم ، مشانقهم سراب 

الدم شيوعي.. 

        رسم باللوحه (سلام) 

الدم شيوعي... 

        شمَّس الدنيه (فهد) 

وذاب تمثال الثلج 

وضحكت الدنيه ربيع

واحد ثلاثين آذارك شقائق  

والعتب... 

       ما ظل عتب

بساحة التحرير وردة 

وردة حمرة... 

زوگت شفة عرايس للحزب 

بساحة الحرية وبگل الوطن 

بيوت يبنيها الفقير.. 

مدرسة ومرجوحة وحديقة 

والحلم بيگ الحلم... 

             گلش  چبير 

يا حبيبي الدنيه ضاگت  

وخلگگ الواسع ضمير 

خلگگ.. 

  ضمير 

...... 

تحميل التطبیق علی موبایل اندروید و اپل