/
/
/
/

جور..
اشما طفح غيظك على الناس
سليل الظيم الك بالساس نداس
لون تكبر حقد
نكبر علامات
وجذب شمس الظهر بالباع تنجاس
تذل كثره الكصص
حد لطخة الطين
وكصصنه ..
ابشدة التاريخ تنباس
فرق بين اليبيع اسمه وسجاياه
وما بين الوفي
الما دنك الراس
ومن بين الحزن والآه والياويل
ومن ركبة طفل..
ما كاوت الميل
ومن بين العطش
والجوع.. والنار
ومن بين الثواجل والمجاتيل
ومن بين الصبر والطيف والحيف
ومن بين الجفوف المالهن حيل
لون ليل الغدر يكبر علامات
نشع نجمة صبح ونشتت الليل..
مهو وحده الصدى الصادك مع الصوت
وابن ليلة غوه اليتهيب الموت
هلج يا كاع لا ترجف حناياج
يخون اسمه النجه ابروحه وتعداج
ولون هبت عكس ريح التغاريب
وسحب روحه السمه
احنه عيونه اسماج
ذره ايامج كحل واسمج مواويل
ودمنه ايهون الج لو غيرنه انطاج
وحك ليل الجرح والويل والحيل
العثره اشما تصير ايفوته السيل
وحك ملح الخبز والطيب واللون
يمر الموت بينه وما يمرون
المنازل شرعبت للنار والنار
تشب.. هلبت تفرزن دار من دار
يلطخ صفحة الانجيل كانوص
ويلوث صفحة القرآن غدار
ويساوم على الشرف والناس جاسوس
ويبيع ويشتري المهزوز الافكار
وحك ملح الخبز والطيب واللون
يمر الموت بينه وما يمرون
وتهون..
اشما طفح ميزانها تهون
الوكت صهوة مهر وتجيب البطون
وعرفنه السلطو سيف الوصايات
باسمنه شكد حجوا
وشكد يجذبون
وعرفنه الريح من تقسي ويه الاشجار
يوهسا الكطع بالخاويه ودون
الشمس غايه وشرف لليعشك النور
ودرب قرص الشمس من كال مامون
وحك آخر وصيه من اليطيحون
يمر الموت بينه وما يمرون

تحميل التطبیق علی موبایل اندروید و اپل