مجرمين وحاقدين اعله الظلام
وساهمو في ثورة الحب والحياة
اولا .. الورد مجرم خطير
يمسح دموع اليتامى
ويشبه خدود البنات
والهوه اكبر عميل
يساعد المعدوم .. لو ضكه الحبل ينطي ثبات
وجان ثالثهم الماي
وهذا سالفته جبيره
وكر لاصحاب القضيه
ويستحي من اسم الفرات
شما نحبسه .. شما نضمه
يستجيب يصير غيمه
وينزل بدعوات مظلوم وصلاة
وطبقو حكم الاعدام
نفذو بالورده شنقوهه بغصنهه
وطاحت بنص النبات
والهوه خنكو نسيمه
وعلكو يتمرجح بنص السمه .. بلايه حياة
ومن اجو للماي ما كدرت اديهم
شلون حبل اعدامهم يلتف عليه وهوه ماي
احتارو بأمره القضاة
ناقشو فكرة اعدامه
ووصلو الحل الطغاة
جمدوه .. سووه ثلج .. شدو ركبته
ومن بعدهه الماي مات