اول مره
افتخر بعراقيتي
بعد حفنة سنين
من القهر
والخوف والخذلان
احس نهرين
متوثبات
يمشن فوگ روحي
وينتفض بيتي
اول مره اشوف
النجمه نجمه
والشمس شمسين
جانت عيني
ماتتسمى
من سيل المدامع
عين
اول مره
يهجرني المرض
واسترد عافيتي
اول مره أصيح
بصوت عالي
ومايبح صوتي
هذا آنا العراقي اليوم
اعتّز بعراقيتي !
ماكو وطن
تخبرنا الاساطير القديمه، الكتُب، والأديان
الله
على صورته
شكّل الصلصال
مامسته نار وهوه
ولا دخان
ونفخ بيه نسمه
من روحه
عطس
وتگوّن الانسان
قبل مايخلق
ابهل ارض
اوطان
وحرّم دمه
ع السلطات والسلطان
وكتب آياته بالانجيل
والتوراة
والقرآن : أبد ماكو
وطن من غير انسان !