گام الداس يا عباس
لا تهمس
حچي البسكوت ياذينه
خلنه اويه الحچي المكشوف
لو طاح الجمل كثرت سچاچينه
طحنه والجروح اجروح
شيفيد الفزع لينه
مثل ريشه ابمهب الريح
ياخذنه او يرد بينه
خشبه ابروج وسفه الروج والينه
شردانه ابحلگ واوي
مدري المن يودينه
جزنه امن العنب وانريد
سله او ضاعت اعلينه
ما تعرف حمامهه وين
تاهت والرجل وينه
ضاع الخيط والعصفور
حامينه حرامينه
اختلط بالحابل النابل
ياهو الگام حادينه
خربطنه الغزل والكور
ذيب او زاد واوينه
غطه انچمل الغرگان
بله انزيد الطينه
الف نعله اعله ابو الشيطان
وزنه او گام یغرينه
لكن درس لقنّاه
صرنه احنه شياطينه
كل واحد ركب راسه
صفينه او كلمن ابدينه
الشمل شمل الثربه چان
بنات النعش تالينه
كل واحد حدر نجمه
مبروك او تهانينه
نبدي اعله السراب
صرنه الحقد عامينه
الوادم وصلت المريخ
غطت شينهه ابزينه
صنعت فاكس وانترنيت
واحنه موت صنعينه
كفو او نعمين منه
خوش سوينه
بقينه انرواح اعله الگاع
بالمگلوب ردينه
نهم بالجار والمجرور
منو الفاعل منو المفعول
نتبجح ابماضينه
عبيد الاجنبي صرنه
اسباع اعله اهالينه
درخنه (السوري) و(الكود نايت)
حچی الطيبين ناسينه
تركنه الصدگ والمعروف والطيبات والزينه وأخذنه او يشهد التاريخ
بيه اشما اكو شينه
صار اغراب واحدنه
وامضيع مشتينه
لاهي طايره او نرتاح
لا عالگاع رجلينه
لا احنه عرب حته
لا مثل انگليزينه
قيم الرگاع من ديرة عفچ
بیبای صارت كل أمانينه