كاظم السماوي
لحد يدور احگوگه....عد الحكومه البوگه
مگرود يبقه ابن الوطن
حسباله حسباته انتهن
يعتقد زردومه اندهن
مايدري بس هالضوگه......عند الحكومه البوگه
حاتم الهاشمي
مگرود ابن الاهوار
وأبن النجف والانبار
بوگ ونهب للستار
والشعب نازل سوگه.....عند الحكومة البوگه
كريم كاظم السعداوي
مكرود ياهذا الوطن
بالظيم عايش والمحن
ياهو اليحكمه بهالزمن
يلعب لعب بطروكه---عد الحكومه البوكه
ماجد الحلاوي
نشکي ولا واحد سمع
عیشونه بوهام وبدع
للثوب ماتنفع رگع
کلش چبیره شگوگه... عند الحكومه البوكَه
اسامة العبيدي
طعنه المنافق والخبل
وهوايه رخينه الحبل
ذيل الجلب ما ينعدل
لو بينه خير انسوكه....عد الحكومه البوكه
باسم السماوي
مسكين ياشعب ألذرى
ردوك چنهـــــم للورى
باكَوك وعيـــونك ترى
أمريكا وي هل جوكَه .. عند ألحكومه ألبوكَه
علي الغريب
مرينه بيكم ياحـــــمد
مامش بعد شي أنحصد؟
كل ظنتي الظلم انوئد!
لابد طريقه نعوكَه ... عند الحكومه البوكَه
حاتم الهاشمي
بيدين حسنه أم اللبن
احلامنه كلهه انتهن
صارت الغيرة ابلا ثمن
ويه اللبن مطروگه.....عند الحكومة البوگه
احمد الصالحي
هاي الحكومه امخالفه
ما ظن بعد بيهه وفه
امبينه القضيّه امزيّفه
وبالكَصه هالمدكَوكَه .... عند الحكومه البوكَه
حمودي الحياوي
الدسـتـور گِـلي شـوصه
گـطعــو علينه الحصـــه
والشـكــر بـاگــو نصــه
خلــونه بس انضوكَـــه .. عند الحكومه البوگــه
علي الغريب
رغم الجرى ياهالوطن
واهوالك الراحن وآجن
تبقى عراق النه حضن
عاشكَ وفي المعشوكَه .... عند الحكومه البوكَه
اسامه العبيدي
يابرلماني اسمع ولك
كبلَك على الكرسي هلك
ربك ابلحظه ايبدلك
يا جهرة العكَروكَه .. عند الحكومه البوكَه
علي الغريب
لابد نغير هالوضع
والخير بالديره يشع
الحصه ماقط تنكَطع
الواحد عسل ريوكَه .... عند الحكومه البوكه
باسم ألسماوي
أتعلـّموا عالبــوكَـ ألربع
والچذب صار ألهم طبع
ينعدل كل هـــذا ألوضع
بثوره تظل معلوكَه.... عند ألحكومه ألبوكَه
جلال البطاط
ياناس ملينة الصبر
وكسر الوطن ماينجبر
الجره بتونس لو مصر
كل طاغي راح يضوكَه....عند الحكومة البوكَه
ماجد الحلاوي
إحنه اللي سلمنه الوطن
بيدين حسنه أم اللبن
حگ الفقير إبهل زمن
نامت عليه طابوگه... عند الحكومه البوكَه