/
/

يمّه يا يمّه المدارس فتحت بيبانهه

حلك إزهارالحدايق طرزوا بستانهه

تزهي شدّات الورد يمّه چثيره الوانهه

فرحه بالعام الدراسي

أدري يمه لكن أشبيدي ييمه وكتي مايل

وأدري غنت موطني إزهور الخمايل

وآنه عنهم يمّه غايب أبحث إبوسط الزبايل

 جبت عمرك  عمر قاسي

إعيونك الحلوات يمّه ليش غطاههن تراب

 إو ليش يمه إهدومك إسمال إو عذاب

كل برد كانون يمه إو كل إو شمس آب

ما هزت أصحاب الكراسي

يمّه وإعيونچ وحگچ يمّه ذوله  ناس غربه

أي وحگچ ما تلمهم يمّه وي الشعب قربه

فوگ كربتنه أو حياتگ ذوله   كربه

ذوله أسباب المآسي

يمه شد حيلك يبعد أمك عليهم

إخذ حگك من خشمهم موش أديهم

خلّي صوتك صون هادر يصطيليهم

ياعكاز شيبي أو تاج راسي

يمه عد عينچ وحگ طاهر حليبچ

وحگ غفة  إذيالچ ييمه وحگ شيبچ

أبقه يا يمّه وحگچ شيمتي همسة نحيبچ

بيهه أهز الكون وإجباله الرواسي

عفيه يمه  هيبة الأيام يا حلمي الچبير

بيك أباهي الدنيه فرحه أو نجمه أصير

 ويه صوتك غاد وإبساحة التحرير

أميره آنه الشمس والگمر حراسي

إنتِ أميره يمه .... وإعيونچ براق

إو دمّي فدوه إو الف فدوه  خل يراق

يمه أبنچ آنه أبنچ نذر لعيون العراق

گلبي روحي  .. حلمي إحساسي

عفيه يا ضنوة أبوك البار يا ذخر المشيب

يا حبيب إسنين تعبي يمّه يا أجمل حبيب

إلتجيب إهديب مثلك يمّه أبداً ما تخيب

إو لا يخيب الوطن وچفوف عباسي

إبساحة التحرير باچر أگلب الدنيه عليهم

 وآخذ الحگ من خشمهم موش أديهم

وأنــــــدهم أخواني عليهم ها عليهم

نوصل الخضراء وإنهد الكراسي

تنزیل التطبیق علی موبایل اندروید و اپل