بمناسبة يوم الشهيد الشيوعي
الشهيد عبد العال الشريباجي

( أبو مؤيد )
بين عيونك والنظاره
رسمت الأيام دنيه
إمطرزه إبحبات من عرگ التعب
نادر إسنينك ألذ قربان من أجل الشعب
تعبت الأيام من هول النوايب
وإنته حسك ما تعب
أنطبع مانشيت فكرك بالجريده
يرسم الدنيه الجديده
فزز العالم نشيده
الموت شنهو الموت
من أجل النريده
الوطن حر الوطن
والشعب عيشه سعيده

الشهيد خالد محمود الأمين

عطر هاواي من باريس
شهگة إحديثه إبحضرة العريس
جمال الكون كله إبرعشة الوجنات متباهي
حگه والتباهي إيلوگ
يا لهفة إگرنفل.. يا نده تشرين
يمطر شوگ
لاويت الظلام إو فززيته إعيون غبشه
إو طرزالك طوگ
ما هبت المنيه إو ..لا حچي الودرين
لا حاشاك يابوعيون نرجس
تضحك إعله الموت شنهي الموت ؟
إنته الموت منك ماخذ أطباعه
طبع بس ياخذ الزينين
وإنته الزين يمه إو حانت الساعه

الشهيد هندال

إزنود سمره
شيمة الچاكوچ بيهه حلم طفله
أصلف من خلگ سجّان
وأترف من جنح نحله
البنفسج من يمره
إيغار من لونه طبع دهله
أمريع من فرات الطيب فكره
إو من عذب دجله
هندال الضوه
إبنص لمة العمال والحله
سجنهه إو نگرة السلمان تشهدله
صلف كلش عنيد إبساعة الكلفات
وأسهل من سهل لو صارت السهله
سواليفه أغاني العيد
صفناته همس گذله
نزيه إمن النزاهه أنزه
حلو من الحلاه أحله
نذر عمره إبطريق الناس
عرس إشموع تتناثر وفه أمفرعه
طبع قديس ما غير أبد طبعه
صلاة العيد فكره إو خطبة الجمعه
شكد روحه رخيصه ساعة المركاض
إكحيله إبأول الفزعه
سد إيواكح الطوفان
ساعات المواكح ما خذل ربعه
على إچتاف المنيه إبشوگ غنّه الشوگ
سمَّع العالم نشيده
إلنريده .. إلنريده
الوطن حر الوطن والشعب عيشه سعيده
غنَّه وإسمه
إبشفة العمال صار أجمل قصيده
((حي ميت هندال إنريده
حي ميت هندال إنريده))

الشهيدة زاهرة ذياب

بين قداح الحواجب والرمش
همسة عطر
غيرة إبنادم چبيره
ضحكتچ آيات تتلو
إو بسمة إعيونچ حرير
أغنيه إو جلاد وأسرار إو أمير
شوگ دمچ
خط على الحيطان
من سحر الوسن
نذر مني الروح .. لعيون الوطن
والحزب ترجيه ترفه
أتسامر إمتونچ محنه
بيهه حب الناس كل الناس
والدنيه إنعجن
زاهره إو زهرة إخدودچ
بالشجاعه إو بالصبر
إتحدت أهوال إو محن
بالحزب غنت مهابه إو بالوطن